Ամբողջացնելէ ետք Կարօ Սասունիի «Լէյլանս» հատուածը, միջնակարգի Է. դասարանի աշակերտները հայերէնի դասապահուն ներկայացուցին իրենց նախասիրած անասունը։ Այս ներկայացումով անոնք հարստացուցին իրենց գիտելիքները, ինչպէս նաեւ` հայերէն լեզուի բառամթերքն ու բանաւոր արտայայտութիւնը։
Երեքշաբթի, 25 Նոյեմբեր 2025-ին, Դոկտ. Հրայր Ճէպէճեան այցելեց Ճեմարան: Ան հանդիպում ունեցաւ տնօրէնութեան եւ նախակրթարանի հայերէնի ու հայոց պատմութեան ուսուցիչներուն հետ եւ անոնց նուիրեց «Մանուկներու Աստուածաշունչը» : Ապա տեղի ունեցաւ նախակրթարանի աշակերտներուն հետ հաւաք մը, ուր ներկայացուց «Մանուկներու Աստուածաշունչը» նորատիպ հատորը եւ նուիրեց իւրաքանչիւրին:
«Իրաւունքներ եւ պարտականութիւններ» բնաբանի աշխատանքներու ծիրէն ներս, նախակրթարանի Ե. դասարանի աշակերտները ֆրանսերէն լեզուով խոյզեր կատարեցին մարդու իրաւունքներու պաշտպանութեամբ զբաղող մեծ դէմքերու մասին: Այս աշխատանքին ընթացքին, անոնք յայտնաբերեցին յանդուգն կիներ եւ տղամարդիկ, որոնք ներդրում ունեցան աշխարհը աւելի ազատ եւ աւելի արդար վայր դարձնելու գործին մէջ:
Ուրբաթ, 28 Նոյեմբեր 2025-ին, ՀՕՄ-ի Նորսիկեան մանկապարտէզի փոքրիկները մարզական տարազներով այցելեցին «Աղբալեան-ՀՄԸՄ» մարզամշակութային համալիր, ուր խաղերով, մրցումներով, մարզանքներով եւ մարզիկներու հետ հանդիպումներով շատ հաճելի ժամանակ անցուցին։ Անոնք հետեւեցան մարզիչներու եւ մարզիկներու ցուցմունքներուն եւ փորձեցին մարզական տարբեր շարժումներ։ Երբ դպրոց վերադարձան, փոքրիկները արդէն որոշած էին ապագային կողովագնդակի խաղացողներ ըլլալ։
Երեքշաբթի 25 Նոյեմբեր 2025-ին, գիտութեան դասապահուն, տարրական բաժինի Ա. դասարանի աշակերտները այցելեցին մրգավաճառի խանութ (Akiki frères), ուր ծանօթացան տարբեր տեսակի պտուղներուն, գնում կատարեցին, ապա մրգաջուր խմեցին: Աշակերտները իմացան, թէ որքան օգտակար է ամէն օր միրգ մը ուտելը եւ դպրոց հասնելէ ետք կերան սննդարար միրգերով պատրաստուած աղցան մը։
Չորեքշաբթի, 19 Նոյեմբեր 2025-ին, կեանքի հմտութիւններ եւ ընկերային կազմաւորման ծրագիրի ծիրէն ներս, Ճեմարանի շրջանաւարտ Տոքթ. Իշխան Եղիայեան հանդիպում մը ունեցաւ նախակրթարանի Դ. դասարանի աշակերտներուն հետ։ Ան խօսեցաւ առողջ կենցաղի, հաւասարակշռուած սննդականոնի եւ ակռաներու լաւ խնամքի մասին։ Աշակերտները շատ հարցումներ ունէին, Տոքթ. Իշխան մանրամասն բացատրութիւններ եւ լուսաբանութիւններ տուաւ անոնց։
Երկուշաբթի, 17 Նոյեմբեր 2025-ին, կազմակերպութեամբ ընկերային ծառայութեան գրասենեակին, տեղի ունեցաւ զրոյց մը տարրական բաժնի Ա. եւ Բ. դասարաններու աշակերտներուն հետ։ Ճեմարանի շրջանաւարտ հոգեբան Քրիսթել Աճէմեան աշակերտներուն խօսեցաւ սիրոյ, յարգանքի եւ զգացումներ արտայայտելու մասին։ Վերջաւորութեան ան ամրապնդեց աշակերտներուն գիտելիքները փոքր խաղով մը:
Մաքրութեան բնաբանի ծիրին մէջ ներս մանկապարտէզի կապոյտ դասարաններու մաքրասէր փոքրիկները մեծ ուրախութեամբ կը հետեւին Ճեմարանի ընկերային ծառայող Սիլվա Սողոմոնեանին եւ իր խամաճիկներուն՝ Անիին ու մեծ մայրիկին։ Ապա մեծ սիրով օճառով եւ ջուրով կը մաքրեն իրենց դասարաններն ու բակը։
Ուրբաթ, 21 Նոյեմբեր 2025-ին, տարրական բաժինիի աշակերտները նշեցին Լիբանանի անկախութեան տօնը։ Անոնք լսեցին Լիբանանի մասին ընդհանուր տեղեկութիւններ, որմէ ետք երգեցին եւ արտասանեցին Լիբանանին նուիրուած երգեր եւ արտասանութիւններ, ապա ճաշակեցին լիբանանեան համեղ ուտելիքները։
Ուրբաթ, 21 Նոյեմբեր 2025-ին, նախակրթարանի աշակերտները նշեցին Լիբանանի անկախութեան տօնը։ Անոնք մեծ խանդավառութեամբ մասնակցեցան Լիբանանի նուիրուած զարգացման մրցումի մը, որմէ ետք միասնաբար ճաշակեցին լիբանանեան ուտելիքներով պատրաստուած նախաճաշը։
Չորեքշաբթի, 19 Նոյեմբեր 2025-ին, Մ. եւ Հ. Արսլանեան Ճեմարանի Դ. դասարանի աշակերտները մեծ խանդավառութեամբ մասնակցեցան յատկանշական առցանց դասապահու մը Փարիզի Իսի-լէ-Մուլինոյի Համազգային-Թարգմանչաց վարժարանի իրենց հասակակիցներուն հետ։ Մայրենին դարձեալ եղաւ այն շաղկապը, որ միացուց երկու երկիրներու փոքրիկները՝ ջերմութեամբ, ժպիտներով ու բաց սրտերով։ Դասապահը բացուեցաւ ջերմ «Բարի լոյս»ով։ Յատկապէս ուրախալի…
