Երկրորդական բաժինի աշակերտներուն կազմակերութեամբ Երեքշաբթի, 23 Ապրիլ 2019-ի առաւօտեան ժամը 8։00-ին Համազգայինի Մ. եւ Հ. Արսլանեան Ճեմարանի նախակրթարանի, միջնակարգի եւ երկրորդականի աշակերտները Հայոց Ցեղասպանութեան 104-ամեակը ոգեկոչեցին «Գարագաշեան» սրահին մէջ։

ԺԱ. դասարանէն Արին Կիւլլիւճեան ընթերցեց բացման խօսքը, ապա տեղի ունեցաւ տեսերիզի ցուցադրութիւն։ Այնուհետեւ սկսաւ գեղարուեստական յայտագիրը. յաջորդաբար ասմունքեցին Շահան Հաւաթեան (ԺԱ) եւ Նարօտ Խաչատուր (Ժ) Գեղամ Սարեանի «Դէպի Կառափնարան»ը, Հրակ Դրօ Կիւրիւնլեան (Է) ՝ Թումանեանի «Հայրենիքիս հետ»ը, Լոռի Մխճեան (Է) Թումանեանի «Հայ Ուխտաւոր»ը։ Ապա Կայէլ Գրիգորեանի (ԺԱ). Կարօ Գրիգորեանի (ԺԲ) եւ Նարեկ Մեսրոպեանի (ԺԲ) նուագէն ետք, յաջորդաբար ասմունքեցին Ալիք Քէշիշեան (Ե)՝ Թէքէեանի «Պիտի իյնաս»ը եւ Հրակ Լախեան (Թ)՝ Պարոյր Սեւակի «Եռաձայն Պատարագ»ը։ Ժ. եւ ԺԱ. դասարանի խումբ մը աղջիկներու պարով աւարտեցաւ ձեռնարկի գեղարուեստական բաժինը։