Մ. Եւ Հ. Արսլանեան Ճեմարանի աշակերտական պատուիրակութիւնները այս տարի եւս մասնակցեցան Model United Nations (MUN) ծրագրին, որ յաջորդաբար 10-րդ տարին ըլլալով կը կայանայ՝ հովանաւորութեամբ Լիբանան-Ամերիկեան Համալսարանին (LAU): Երկրորդական բաժինէն 16 աշակերտներ մասնակցեցան ծրագրով նախատեսուած վարժողական հանդիպումներուն, որոնք երկարեցան 5 շաբաթներու վրայ: Այդ հանդիպումներուն, աշակերտները խորացուցին իրենց գիտելիքները Միացեալ Ազգերու Կազմակերպութեան (ՄԱԿ) մասին, զարգացուցին ուսումնասիրութիւններ կատարելու իրենց կարողութիւնը, ծանօթացան ՄԱԿ-ի զանազան կառոյցներու աշխատակարգին եւ սերտեցին փաստաթուղթեր կազմելու, բանախօսելու, տագնապներու խաղաղ լուծման ուղղուած բանակցութիւններ վարելու, երկիրներու դիւանագիտական ներկայացուցչութիւնը կատարելու եւ ՄԱԿ-ի բանաձեւեր գրելու սկզբունքները: Ծրագիրը եզրափակուեցաւ համագումարներով` տարածուած երկու օրերու վրայ: Այդ համագումարներուն Ճեմարանի աշակերտները մասնակցեցան իբրեւ Ֆինլանտայի դիւանագիտական ներկայացուցիչներ եւ զանազան յանձնախումբերու մէջ ներկայացուցին երկրին կեցուածքը՝ առաջադրուած խնդիրներուն մասին, նմանակելով ՄԱԿ-ի մէջ աշխատանքը՝ իր տարբեր դրսեւորումներով: Աւարտին, Յակոբ Թաշճեանին շնորհուեցաւ Դիրքորոշման փաստաթուղթի մրցանակ (Position Paper Award):