Նախակրթարանի Ե. դասարանի «աշխարհագրութիւն» դասանիւթին ծիրէն ներս, աշակերտները այս տարի առիթը ունեցան աւելի խորունկ ձեւով ծանօթանալու Լիբանանի աշխարհագրական կառոյցին ու հարստութեան։
Առաջին կիսամեակի աւարտին, Ե. դասարաններու աշակերտները վիճակաձգութեամբ ընտրուած լիբանանեան տարբեր շրջաններուն մասին կատարեցին ինքնատիպ պրպտումներ՝ ներկայացնելով իւրաքանչիւր վայրի դիրքը, հնութիւններն ու աւանդութիւնները։ Խաւաքարտերու վրայ պատկերուած այս «երազային շրջագայութիւնը» հարստացուց իրենց գիտելիքները մեր երկրին մասին։
Դժբախտաբար, ներկայիս Լիբանանի կարգ մը շրջաններ ռմբակոծումներու թիրախ դարձած են, ինչ որ կը խանգարէ մեր ծրագրած դպրոցական այցելութիւնները։ Յոյսով ենք, որ մեր սիրելի Լիբանանը շուտով կը վերագտնէ իր խաղաղութիւնը, որպէսզի այս երազային պտոյտը դառնայ իրականութիւն։
