Մանկապարտէզի կանաչ դասարաններու վերամուտը տեղի ունեցաւ Երեքշաբթի, 2 Հոկտեմբեր 2012-ին, իսկ վարդագոյն եւ կապոյտ դասարաններու աշակերտներուն վերամուտը՝ 3 եւ 4 Հոկտեմբերին։ Յիշեալ օրերուն, առաւօտեան ժամը 8։30-ին աշակերտները հաւաքուեցան մանկապարտէզի բակը, ուր ուսուցչուհիները կանաչ դասարանի փոքրիկներուն վիզերուն անցուցին գունաւոր puzzle-ներ, կապոյտ դասարանի փոքրիկներուն՝ գունաւոր ժպտուն դէմքեր, իսկ վարդագոյն դասարանի փոքրիկներուն՝ գունաւոր աստղեր։ Բոլոր աշակերտները երգեցին, պարեցին, ապա ուսուցչուհիներուն հետ բարձրացան իրենց դասարանները։ Կապոյտ եւ վարդագոյն դասարաններու փոքրիկները վերամուտի առաջին օրը 2 ժամ մնացին իրենց ծնողներուն ընկերակցութեամբ, ապա մեկնեցան դպրոցէն։ Անոնք յաջորդ առաւօտուն վերադարձան մանկապարտէզ եւ սկսան իրենց նոր դասարաններու դպրոցական առօրեային։