Ուրբաթ, 13 Մայիս 2022-ին, Ճեմարան այցելեց ճարտարապետ Մովսէս Տէր Գէորգեան եւ հանդիպում ունեցաւ երկրորդական բաժինի Ժ. դասարանի աշակերտներուն հետ:
Ան հաճելի եւ հետաքրքրական զրոյց մը վարեց անդրադառնալով հայերէն լեզուի օգտագործման՝ մասնագիտական տարբեր ոլորտներու մէջ: Ան ըսաւ, որ սոսկ խօսակցութեան համար գործածելէ անդին անհրաժեշտ է լեզուն այսօրուան կալուածին մէջ դնելը, ստեղծագործական առումով:
Ան խօսեցաւ նաեւ թարգմանական գրականութեան կարեւորութեան մասին եւ ներկայացուց վերջերս իր թարգմանած Ջորջիո Ագամբենի փիլիսոփայական գիրքերը` «Ի՞նչ է տրամադրիչը», «Բարեկամը» եւ «Ի՞նչ է ժամանակակիցը»:
Հանդիպման աւարտին, Մովսէս Տէր Գէորգեան Ճեմարանի գրադարանին նուիրեց իր թարգմանած գիրքերը եւ Գրիգոր Պըլտեանի 75-ամեակին նուիրուած շարքը, որ կը բաղկանայ 15 հատորներէ եւ կը ներկայացնէ գրողին անտիպ թէ տպուած երկերէն հատընտիր անջատ գործեր:
