Հինգշաբթի, 30 Ապրիլ 2015-ին Ճեմարանի բոլոր բաժիններուն մէջ տեղի ունեցան հայկական մշակութային միջոցառումներ: Մանկամսուրի փոքրիկները ձեռային աշխատանքով նուռ պատրաստեցին եւ ծանօթացան պտուղին: Մանկապարտէզի փոքրիկները ծանօթացան հայկական գործիքներու, ձեռագործի, հայկական ճաշի պատրաստութեան եւ Թումանեանի պատմութիւններուն: Անոնք պատի թերթի աշխատանք կատարեցին, տեսերիզ դիտեցին եւ հայկական ճաշ կերան: Տարրական բաժինի աշակերտները ներկայացուցին հայկական աւանդական հարսանիքը, որուն վերաբերող ձեռային աշխատանք կատարեցին, աւանդոյթներուն ծանօթացան, հարսը պատրաստեցին ու տհոլ-զուռնայով դարձան դպրոցին շուրջ: Նախակրթարանի աշակերտները բաժնուեցան ինը խումբերու, որոնք օրուան ընթացքին մասնակցեցան մշակութային զանազան աշխատանոցներու՝ հայկական ժողովրդային նուագարաններու ծանօթացում եւ երաժշտութեան ունկնդրութիւն, հայկական տարազներու ծանօթացում, Թումանեանի հեքիաթներու ունկնդրութիւն եւ բեմականացում, հայ հանրածանօթ դէմքերու մասին ցուցադրութիւն, հայոց պատմութեան ժամանակագրական պատի թերթ, ձեռային աշխատանք, զարգացման մրցում, հայկական խոհանոցի մասին գիտելիքներ, ցեղասպանութեան 100 ամեակի նուիրուած որմազդի պատրաստութիւն, ազգային պատմութեան ունկնդրութիւն…: Միջնակարգի եւ երկրորդականի Ժ. դասարաններու աշակերտները մասնակցեցան զարգացման մրցումի մը, ապա իւրաքանչիւր դասարան ներկայացուց հայկական շրջան մը՝ իր աւանդոյթներով: Օրուան աւարտին տեղի ունեցաւ գեղարուեստական յայտագիր՝ նուագ, երգ ու պար: Նկարներուն համար այցելել այս էջը: