Եօթներորդ դասարանի ընդհանուր պատմութեան առաջին դասը բիւզանդական կայսրութեան մասին էր. աշակերտները ծանօթացան անոր պատմութեան գլխաւոր անցուդարձերուն ու մօտէն ուսումնասիրեցին մայրաքաղաք Կոստանդնուպոլիսը, որ կայսրութեան քաղաքական, կրօնական և տնտեսական կեդրոնն էր: Հոս կը գտնուէին կայսերական պալատները, Ուղղափառ քրիստոնեաներուն եկեղեցիները, որոնց մէջ կարելի է առանձնացնել Սուրբ Սօֆիա գլուխ գործոց եկեղեցին և վերջապէս, Եւրոպայի, Ասիոյ և Ափրիկէի միջև կամուրջի դեր խաղացող Կոստանդնուպոլսոյ նաւահանգիստը:
Զուգահեռներ անցընելով երկու մայրաքաղաքներ՝ Կոստանդնուպոլսոյ և Պէյրութի միջև, աշակերտները անդրադարձան որ այս վերջինն ալ իր հերթին կը կամրջէ երեք ցամաքամասերը և կ’ընդգրկէ երկրի զանազան քաղաքական, կրօնական թէ՝ տնտեսական կեդրոնները:
Ահա այս գաղափարներէն ելլելով, կազմակերպուեցաւ եօթներորդ դասարանի «արշաւը» դէպի Պէյրութի նաւահանգիստ և կեդրոնական շուկաներ:
Առաջին հանգրուանն էր Պէյրութի նաւահանգիստը, ուր աշակերտները դիմաւորուեցան Պրն. Րաֆֆի Աշգարեանին կողմէ: Ան նաւահանգիստի ֆինանսներու տնօրէնն է ինչպէս նաև Ճեմարանաւարտ է ու Ճեմարանի նախկին ուսուցիչ: Պարոն Րաֆֆին հանրաշարժով շրջեցաւ աշակերտներուն հետ նաւահանգիստի տարբեր բաժինները և մանրամասն տեղեկութիւններ տուաւ նաւահանգիստի կառոյցին, հոն հանգրուանող նաւերուն, նաւահանգիստէն ներս կատարուող առևտուրին, ծանրաբարձ կռունկներուն, զանազան չափերով բեռնարկղերուն մասին: Ապա ան աշակերտները ընդունեց իր գրասենեակէն ներս, պատասխանեց անոնց բոլոր հարցումներուն: Պարոն Րաֆֆին աշակերտներուն համար պատրաստած էր նաև նաւահանգիստին մասին պատմող պատկերազարդ թղթածրարներ:
«Արշաւի» երկրորդ հանգրուանն էր Պէյրութի կեդրոնական շուկաներու շրջանը: Հոս աշակերտները այցելեցին Ուղղափառներու Սուրբ Գէորգ և Հայ Առաքելական Սուրբ Նշան եկեղեցիները: Ընդհանուր պատմութեան ուսուցչուհին՝ Տիկ. Շողիկը բացատրութիւններ տուաւ ամէն մէկ եկեղեցիի ճարտարապետական թէ դաւանանքային իւրայատկութիւններուն մասին: Շրջագայութեան ժամանակ աշակերտները տեսան նաև երկրի քաղաքական գլխաւոր կեդրոններէն երկուքը՝ խորհրդարանն ու վարչապետարանը, ինչպէս նաև քաղաքի Կապոյտ մզկիթը (Հարիրիի մզկիթը), որ նմանօրինակն է Կոստանդնուպոլսոյ Սուրբ Սօֆիա եկեղեցիին:
Թէև օրը երկար էր եւ օդը՝ անձրևոտ, աշակերտները անձրևէն պատսպարուած էին այս օրուան համար նախատեսուած յատուկ անձրևանոցներով և շատ ուրախ ու գոհ վերադարձան դպրոց: